ਤਾਜਾ ਖਬਰਾਂ
ਦਿੱਲੀ ਦੇ ਈਸਟ ਆਫ ਕੈਲਾਸ਼ ਇਲਾਕੇ ਵਿੱਚ ਇੱਕ ਸੀਨੀਅਰ ਆਈ.ਆਰ.ਐਸ (IRS) ਅਧਿਕਾਰੀ ਦੀ ਧੀ ਨਾਲ ਹੋਏ ਜਬਰ-ਜ਼ਨਾਹ ਅਤੇ ਕਤਲ ਦੇ ਮਾਮਲੇ ਵਿੱਚ ਕਈ ਖੌਫਨਾਕ ਖੁਲਾਸੇ ਹੋਏ ਹਨ। ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਮੁਲਜ਼ਮ ਰਾਹੁਲ ਮੀਣਾ ਨੇ ਦਿੱਲੀ ਦੀ ਵਾਰਦਾਤ ਤੋਂ ਸਿਰਫ਼ ਇੱਕ ਦਿਨ ਪਹਿਲਾਂ ਰਾਜਸਥਾਨ ਦੇ ਅਲਵਰ ਵਿੱਚ ਵੀ ਇੱਕ ਮਹਿਲਾ ਨਾਲ ਜਬਰ-ਜ਼ਨਾਹ ਕੀਤਾ ਸੀ। ਦਿੱਲੀ ਪੁਲਿਸ ਨੇ ਮੁਲਜ਼ਮ ਨੂੰ 22 ਅਪ੍ਰੈਲ ਨੂੰ ਦਵਾਰਕਾ ਤੋਂ ਗ੍ਰਿਫ਼ਤਾਰ ਕਰ ਲਿਆ ਹੈ।
ਪੁਲਿਸ ਪੁੱਛਗਿੱਛ ਦੌਰਾਨ ਪਤਾ ਲੱਗਾ ਹੈ ਕਿ ਮੁਲਜ਼ਮ ਰਾਹੁਲ ਬਿਲਡਿੰਗ ਦੇ ਨਕਸ਼ੇ ਅਤੇ ਪਰਿਵਾਰ ਦੀ ਦਿਨਚਰਿਆ ਤੋਂ ਚੰਗੀ ਤਰ੍ਹਾਂ ਵਾਕਿਫ਼ ਸੀ। ਉਸ ਨੂੰ ਪਤਾ ਸੀ ਕਿ ਲੜਕੀ ਦੇ ਮਾਤਾ-ਪਿਤਾ ਸਵੇਰੇ ਜਿਮ ਜਾਂਦੇ ਹਨ। ਲੜਕੀ UPSC ਦੀ ਤਿਆਰੀ ਕਰ ਰਹੀ ਸੀ ਅਤੇ ਘਰ ਦੀ ਛੱਤ 'ਤੇ ਬਣੇ ਸਟੱਡੀ ਰੂਮ ਵਿੱਚ ਪੜ੍ਹ ਰਹੀ ਸੀ। ਮੁਲਜ਼ਮ ਸਿੱਧਾ ਉੱਥੇ ਪਹੁੰਚਿਆ ਅਤੇ ਲੜਕੀ 'ਤੇ ਹਮਲਾ ਕਰ ਦਿੱਤਾ। ਜਦੋਂ ਲੜਕੀ ਨੇ ਵਿਰੋਧ ਕੀਤਾ ਤਾਂ ਮੁਲਜ਼ਮ ਨੇ ਲੈਂਪ ਅਤੇ ਕਿਸੇ ਭਾਰੀ ਚੀਜ਼ ਨਾਲ ਉਸ ਦੇ ਸਿਰ 'ਤੇ ਵਾਰ ਕੀਤਾ, ਜਿਸ ਨਾਲ ਉਹ ਬੇਹੋਸ਼ ਹੋ ਗਈ। ਬੇਹੋਸ਼ੀ ਦੀ ਹਾਲਤ ਵਿੱਚ ਹੀ ਮੁਲਜ਼ਮ ਨੇ ਉਸ ਨਾਲ ਜਬਰ-ਜ਼ਨਾਹ ਕੀਤਾ।
ਜਬਰ-ਜ਼ਨਾਹ ਤੋਂ ਬਾਅਦ ਮੁਲਜ਼ਮ ਦਾ ਮਕਸਦ ਲੁੱਟ-ਖੋਹ ਕਰਨਾ ਸੀ। ਘਰ ਦਾ ਲੌਕਰ 'ਥੰਮ ਇੰਪ੍ਰੈਸ਼ਨ' (ਅੰਗੂਠੇ ਦੇ ਨਿਸ਼ਾਨ) ਨਾਲ ਖੁੱਲ੍ਹਦਾ ਸੀ। ਮੁਲਜ਼ਮ ਲੜਕੀ ਨੂੰ ਸਟੱਡੀ ਰੂਮ ਤੋਂ ਘਸੀਟਦਾ ਹੋਇਆ ਹੇਠਾਂ ਉਸ ਕਮਰੇ ਵਿੱਚ ਲੈ ਆਇਆ ਜਿੱਥੇ ਲੌਕਰ ਸੀ। ਉਸ ਨੇ ਲੜਕੀ ਦੀ ਉਂਗਲ ਲੌਕਰ ਨਾਲ ਲਗਾਈ, ਪਰ ਖੂਨ ਲੱਗਿਆ ਹੋਣ ਕਾਰਨ ਜਾਂ ਬਲੱਡ ਸਰਕੂਲੇਸ਼ਨ ਬੰਦ ਹੋਣ ਕਾਰਨ ਲੌਕਰ ਨਹੀਂ ਖੁੱਲ੍ਹਿਆ। ਪੁਲਿਸ ਮੁਤਾਬਕ ਉਦੋਂ ਤੱਕ ਲੜਕੀ ਦੀ ਮੌਤ ਹੋ ਚੁੱਕੀ ਸੀ। ਅਖੀਰ ਮੁਲਜ਼ਮ ਨੇ ਪੇਚਕਸ ਨਾਲ ਲੌਕਰ ਤੋੜ ਕੇ ਨਕਦੀ ਅਤੇ ਗਹਿਣੇ ਚੋਰੀ ਕਰ ਲਏ।
ਵਾਰਦਾਤ ਦੌਰਾਨ ਮੁਲਜ਼ਮ ਦੇ ਕੱਪੜਿਆਂ ਅਤੇ ਜੁੱਤੀਆਂ 'ਤੇ ਖੂਨ ਲੱਗ ਗਿਆ ਸੀ। ਉਹ ਇੰਨਾ ਬੇਖੌਫ਼ ਸੀ ਕਿ ਉਸ ਨੇ ਘਰ ਵਿੱਚ ਹੀ ਆਪਣੇ ਕੱਪੜੇ ਬਦਲੇ, ਮ੍ਰਿਤਕ ਲੜਕੀ ਦੇ ਭਰਾ ਦੀ ਪੈਂਟ ਅਤੇ ਘਰ ਵਿੱਚ ਪਈਆਂ ਚੱਪਲਾਂ ਪਾਈਆਂ ਅਤੇ ਫਿਰ ਮੌਕੇ ਤੋਂ ਫਰਾਰ ਹੋ ਗਿਆ।
ਪੁਲਿਸ ਸੂਤਰਾਂ ਅਨੁਸਾਰ ਰਾਹੁਲ ਮੀਣਾ ਨੂੰ ਘੱਟ ਉਮਰ ਵਿੱਚ ਹੀ ਆਨਲਾਈਨ ਜੂਏ (ਤਿੰਨ ਪੱਤੀ ਗੇਮ) ਦੀ ਬੁਰੀ ਆਦਤ ਪੈ ਗਈ ਸੀ। ਉਹ ਜੂਏ ਰਾਹੀਂ ਪੈਸੇ ਕਮਾ ਕੇ ਲੜਕੀਆਂ ਨਾਲ ਐਸ਼ੋ-ਆਰਾਮ ਕਰਦਾ ਸੀ। 21 ਅਪ੍ਰੈਲ ਨੂੰ ਅਲਵਰ ਵਿੱਚ ਇੱਕ ਵਿਆਹੁਤਾ ਮਹਿਲਾ ਨਾਲ ਜਬਰ-ਜ਼ਨਾਹ ਕਰਨ ਤੋਂ ਬਾਅਦ ਉਹ ਦਿੱਲੀ ਆਇਆ ਅਤੇ ਆਪਣੇ ਪੁਰਾਣੇ ਮਾਲਕ ਦੀ ਧੀ (ਜੋ 12ਵੀਂ ਜਮਾਤ ਵਿੱਚ ਆਲ ਇੰਡੀਆ ਟੌਪਰ ਰਹੀ ਸੀ) ਨੂੰ ਆਪਣੀ ਦਰਿੰਦਗੀ ਦਾ ਸ਼ਿਕਾਰ ਬਣਾਇਆ।
ਪੁਲਿਸ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਭਾਵੇਂ ਮੁਲਜ਼ਮ ਲੁੱਟ-ਖੋਹ ਦੀ ਗੱਲ ਕਰ ਰਿਹਾ ਹੈ, ਪਰ ਉਸ ਦੇ ਪਿਛੋਕੜ ਨੂੰ ਦੇਖਦੇ ਹੋਏ ਲੱਗਦਾ ਹੈ ਕਿ ਉਹ ਜਬਰ-ਜ਼ਨਾਹ ਅਤੇ ਕਤਲ ਦੀ ਨੀਅਤ ਨਾਲ ਹੀ ਘਰ ਵਿੱਚ ਦਾਖਲ ਹੋਇਆ ਸੀ।
Get all latest content delivered to your email a few times a month.
